ԴԱԴԱՐԵՑՆԵԼ ԱՐՏԱԳԱՂԹԸ ԱՄԵՆ ԳՆՈՎ

       

Վերջերս մաթեմատիկոս բարեկամս պատմեց ինձ տաղանդավոր գիտնականների մասին, որ լքել են Հայաստանը: Մեկը գնացել է Կազան, մյուսը Բրյանսկ, և երկուսն էլ կորել են Հայաստանի գիտության համար: Երրորդը փախել է Ամերիկա, որովհետև այստեղ նրան ոչ մի հնարավորություն չէին տալիս: Նշանավոր գիտնականներ էին, բայց միջազգային ճանաչման հասան Հայաստանից դուրս: Ցավալի է, որ մեր արժանավորները լքում են մեր երկիրը: Առավել ցավալի է այն, որ շարունակվում է առհասարակ արտագաղթը և մամուլում հրապարակվում են ցնցող թվեր` վերջին տարիներին Հայաստանը լքել են մեկ միլիոն երեք հարյուր հազար հայեր: Մենք, մեր երկիրը պարզապես իրավունք չունենք թուլանալու: Գաղտնիք չէ, որ պատմականորեն գտնվում ենք մի տարածաշրջանում, որտեղ քանակն ունի նշանակություն: Մենք չգիտենք, թե մեր ազգային խնդիրների լուծման ինչ հնարավորություններ են բացվելու վաղը: Խնդիրն այլ է` երբ գա այդ բաղձալի ժամը, մենք պատրաստ լինելո՞ւ ենք դրան:

Հնարավոր է, որ մեր հինավուրց հայրենիքին վերատիրելու իրավունքը մենք կորցնենք սոսկ այն պատճառով, որ քանակապես արժանի չլինենք պարզապես դրան: Դա ազգային անվտանգության խնդիր է, և մեր կառավարության յուրաքանչյուր անդամ, երկրի վարչապետը, յուրաքանչյուր մարզպետ, յուրաքանչյուր քաղաքապետ նշանակվել-ընտրվելուց առաջ պետք է խոստում տա ժողովրդին` ձևավորել բարոյական մթնոլորտ և ստեղծել նոր աշխատատեղեր:

Ահա միակ ճանապարհը, որով կարող ենք չարիքի առաջն առնել, դադարեցնել արտագաղթը:

                                                                                                                                                              ԱԲԳԱՐ ԱՓԻՆՅԱՆ

                                                            Երևանի Գրողների Միության նախագահ